Dinamizar a vida social e cultural da parroquia é o impulso que move a un grupo de xóvenes de Noceda a organizar actividades e recuperar antigas tradicións, coma a da Festa da Santa Cruz, que esmorecera nos últimos tempos. Pablo Romeo e Xosé Manuel Alcobre lideran este movemento xuvenil, responsable tamén da creación dunha páxina web que ofrece unha ampla variedade de contidos sobre Noceda. Nos últimos meses xa levan feito unha festa carnavaleira e un magosto nunha parroquia que tén tamén outras dúas festas: A da Pascuílla, da aldea de Lamas, e as patronais, en agosto.

A parroquia lalinense de Noceda está a rexistrar unha notable actividad social e cultural nos últimos tempos, sexa coa recuperación de vellas tradicións coma a Festa da Santa Cruz ou a organización de celebracións, sexa coa creación dunha páxina web propia. Detrás deste movemento encóntranse Pablo Romeo e José Manuel Alcobre, con axuda doutros xóvenes da zona.
Os dous constitúen a comisión das festas da Santa Cruz, que volverá a celebrarse o vindiero día 10 de maio. Nesta celebración é típico que os nenos saian en procesión ataviados con traxes rexionais galegos e, ante a cruz de madeira cravada nas cercanías do centro social, reciten poesías compostas pola xuventude parroquial. Desta volta, serán catorce os nenos que participen nas ofrendas; a súa preparación corre a cargo de Concepción Romeo e María García, ésta última tamén autora das oracións líricas.
Programa de festas
En realidade, as festas prolongaranse durante dúas xornadas. Na primeira, o sábado 9, haberá unha verbena a cargo das orquestras Jerusalén e Samba, mentres que o domingo a Nova Banda de Vilatuxe dará un concerto ao mediodía e outro logo da misa solemne (12.45) e da procesión ata o cruceiro; a verbena contará co Dúo Máster. En caso de choiva, o campo de festexos estará cuberto con carpa.
A Festa da Santa Cruz, que se celebra sempre o primeiro domingo logo do 3 de maio, perdeu protagonismo coa despoboación do rural galego, pero os veciños de Noceda resístense a perder a súa historia, apuntan os responsables da súa recuperación. Por iso, logo da súa perda durante tres anos, retómase agora como parte "da historia deste pobo".
A historia desta romaría é xa centenaria, pois remóntase á construcción dunha cruz en 1905, co gallo dunha misión católica, a unos cen metros da igrexa. Desde entón, os máis novos da parroquia mantiveron a tradición de acudir a ese punto con oracións dedicadas á Virxe María, a quen se dedica o mes de maio na tradición católica, e a Xesús. A celebración xa aparece recollida en documentos antigos, coma un de 1928 no que se louba a concurrencia de romeiros, malia a que "el mal tiempo reinante que impidió que saliera unha procesión en la qeu había de tomar parte las niñas de las dos escuelas nacionales con banderitas". "Fue admirable el orden, disciplina, respeto y buen gusto con que dos niños de las dos escuelas asistieron a estos solemnes actos, por lo que felicitamos a los cultos y trabajadores maestros nacionales señorita Mercedes Araujo Conde y don Manuel Busto, cuya labor meritísima hemos tenido el gusto de apreciar más de una vez", apuntaba a crónica, que citaba a actuación das bandas de Brántega, Lira, Bendoiro e San Xurxo.
Pero a da Santa Cruz non é a única tradición da parroquia. Cincuenta días despois da Pascua celébrase outra cita enxebre, a Festa da Pascuílla de Lamas, que organiza a aldea homónima e na que se honra á Virxe dos Remedios nunha capela. Ademais, os festexos patronais de Santa María e San Roque celébranse cada ano polo 15 e 16 de agosto. E nos últimos meses organizouse a primeira festa do Entroido e fíxose un magosto nas datas outonais nas que se ten celebrado un festival baixo o nome de Noceda Rock.

Portal de internet con información sobre a parroquia

Na páxina web noceda.org pódese encontrar ampla información sobre a parroquia, cun menú no que se ofrecen comentarios sobre a súa historia, a súa situación, os distintos lugares que a conforman ou as principais festas, amais doutros servicios. Tamén poden verse distintas imaxes de acontecementos recentes que tiveron lugar en Noceda ou mesmo algunhas rescatadas dos arquivos dos veciños sobre vellas tradicións, sobre todo festivas.
A creación do portal dixital é obra de Romeo e Alcobre, que contaron neste punto coa colaboración de Juan Taboada. Malia a ser un sitio que vén de ser habilitado recentemente, nestes días andaba xa polas 400 visitas. Os seus autores confían en ir incrementando pouco a pouco os contidos da páxina co gallo de darlle máis difusión tanto entre os veciños, a modo de taboeiro informativo, como entre o público en xeral, para dar a coñecer Noceda no resto do mundo.

 Fuente: http://www.farodevigo.es